Azərbaycanın zəngin tarixi və milli birliyi gələcək nəsillərə ötürülməli olan ən dəyərli sərvətlərimizdəndir. Bu məqsədlə, Bakı şəhəri Yasamal rayonu 53 nömrəli tam orta məktəbin kollektivi bu yaxınlarda Xocalıya səfər edərək, Bakı və Qarabağ məktəbləri arasında təkcə bir tanışlıq deyil, həm də tarixi körpülər quran yeni bir ənənənin təməlini qoyub.
Bu səfərdə 53 saylı tam orta məktəbin direktoru Tünzalə Zeynalova və məktəbin kollektivi Xocalı şəhər 1 nömrəli tam orta məktəbdəki şəraitlə yaxından tanış olub, inkişaf etmiş təhsil mühiti və müasir imkanlarla tanışlıq əldə ediblər.
Məktəbin kollektivi Bakıdan gələn pedaqoji kollektivi məktəbin infrastrukturu ilə tanış ediblər.
Məktəbin direktoru Nəvai Həsənovla aparılan səmərəli fikir mübadiləsi isə iki təhsil ocağı arasında gələcək əməkdaşlıq perspektivlərini geniş müzakirə etmək üçün əla fürsət yaradıb. Bu cür əlaqələr gələcəkdə digər məktəb kollektivlərinin işğaldan azad olunmuş ərazilərdə yeni qurulan məktəblərlə əməkdaşlıqlarını sürətləndirəcək.
Bu cür səfərlərin davamlı olması, gələcək nəsillərimizin Qarabağ həqiqətləri ilə daha yaxından tanış olmasına və Vətən torpağının hər qarışına sahib çıxmasına böyük töhfə verəcəkdir.
