“Müəyyən xəstəliklər baş verdikdə məcburi peyvəndlənmə işləri aparıla bilər. Nazirlər Kabinetinin qərarında hansı xəstəliklər və kateqoriyadan olan insanların məcburi peyvənd olunmalı olduğu qeyd olunub”.
Busaat.az xəbər verir ki, bunu səhiyyə nazirinin müavini Viktor Qasımov Milli Məclisin Səhiyyə komitəsində koronavirusla bağlı keçirilən bugünkü dinləmədə çıxış edərkən deyib. O bildirib ki, epidemioloji vəziyyət davam edərsə, bu məsələyə baxmaq olar.
Nazir müavini həmçinin vurğulayıb ki, ölkədə yaşlı əhalinin dispanserizasiyası (azı ildə bir dəfə tibb mütəxəssislərinin müayinəsindən keçirilmə) tənzimlənmir: “Ola bilsin ki, bu məsələyə qayıtmaq lazım olar və hansısa yolla tənzimlənər. 18 yaşdan aşağı olanların isə peyvəndi könüllüdür. Yalnız valideynlərin istəyi əsasında peyvəndlənmə aparıla bilər. Onlara qarşı heç bir məhdudiyyət nəzərdə tutulmayıb. Çünki bizim peyvəndlənmə strategiyamızda 18 yaşdan yuxarı şəxslərin vaksinasiyası nəzərdə tutulub. “Yoluxucu xəstəliklərin immunoprofilaktikası haqqında” qanun mövcuddur. Həmin qanunda göstərilir ki, peyvənd işləri könüllü aparılır”.
