Ev tikənlərin DİQQƏTİNƏ: “Bahalaşmanın tikinti bazarına təsiri qaçılmazdır”
“Qiyməti daha çox artan tikinti materialları kərpic, sement və armaturdur.”
Bu sözləri mövcud vəziyyətdə müşahidə olunan bahalaşmanın tikinti materiallarının qiymətinə mümkün təsirlərini qiymətləndirən əmlak məsələləri üzrə ekspert Elnur Azadov Busaat.az-a açıqlamasında deyib.
Ekspert bildirib ki, son vaxtlar bəzi inşaat materiallarının qiymətində artım izlənilir:
“Son 3-4 ildə armaturun qiyməti iki dəfə artıb. Misal üçün, 2017-ci ildə armaturun bir ton qiyməti 780-800 manat civarında idi. Hazırda isə 1550-1600 manat civarında dəyişir. Bu kəskin artım son 6 ay ərzində olub.
Qaz və elektrik enerjisinin bahalaşması istehsalçılarda maya dəyərinə təbii ki, təsir edəcək. Elektrik enerjisinin təsiri bir o qədər olmasa da, istehsalında qazın istifadə olunduğu kərpic, şüşə və bəzi materialların qiymətlərinə təsiri özünü göstərəcək. Ümumilikdə isə kommunal xidmətlərin bahalaşması tikinti bazarına təsirsiz ötüşməyəcək. Lakin burada digər məsələ rəqabətlə bağlıdır. İstehsalçılar qiymət artımının fonunda bir-birini izləyəcək və qiymətlərlə bağlı yekun qərar verəcəklər. Bunu isə yaxın zamanda görəcəyik”.
