Finlandiya Türkiyə prezidenti Rəcəb Tayyib Ərdoğanın əlavə müqaviməti ilə üzləşdikdən sonra İsveçi gözləmədən NATO-ya üzv ola biləcəyinə ilk dəfə eyham vurub.
Busaat.az xəbər verir ki, bu barədə Bloomberg yazır.
Məlumata görə, Finlandiyanın siyasətində əhəmiyyətli dəyişiklik görmək mümkündür. Türkiyənin israrlı etirazları ilə üzləşən iki Skandinaviya ölkəsi indiyədək ərizələrini birgə nəzərdən keçirməkdə israr ediblər.
Finlandiyanın yanaşmasını nə dərəcədə dəyişəcəyini görmək zamana qalır. Finlandiya rəsmiləri iki ölkənin eyni vaxtda NATO-ya daxil olması mövqeyində qalır. Ancaq rəsmilər həm də ölkənin təkbaşına NATO-ya daxil olmağa hazırlaşmalı ola biləcəyini qeyd edir.
Bildirək ki, NATO-nun 30 üzvündən ikisi – Türkiyə və Macarıstan hələlik təklifləri ratifikasiya etməyiblər. Bir gün əvvəl Erdoğan, ifrat sağçıların Stokholmda Quranı yandırmasından sonra İsveçin namizədliyini dəstəkləməkdən imtina edib. Onun şərhlərinə cavab olaraq ABŞ rəsmiləri NATO-nun genişlənməsini dəstəklədiklərini bir daha bəyan ediblər.
Ərdoğanın şərhləri İsveçin alyansa qoşulma perspektivləri ilə bağlı şübhələri yeni səviyyəyə çatdırıb, çünki Türkiyə lideri mövqeyini dəyişməyə hazır olub-olmadığını dəqiqləşdirməyib. Mayda keçiriləcək seçkilərlə Ərdoğan dini mühafizəkarların dəstəyini almağa çalışır.
Türkiyənin Helsinki ilə ciddi problemi olmadığı üçün prosesin əvvəlində Finlandiyanın təklifini ayrıca nəzərdən keçirməyi təklif edib, lakin bu ideya həm Şimali Avropa ölkələri, həm də NATO-nun baş katibi Yens Stoltenberq tərəfindən qəbul edilməyib. Bu barədə adının açıqlanmasını istəməyən iki türk rəsmisi bildirib.
Onlar qeyd ediblər ki, Türkiyə Helsinkinin Ankara ilə əməkdaşlığından böyük ölçüdə məmnundur və bu, Türkiyənin qərarına təsir edəcək.
