İran və Rusiya birgə boru kəməri tikəcək

 “İran şirkəti Rusiya şirkətlərinin dəstəyi ilə neft məhsullarının daşınması üçün boru kəməri çəkməyi planlaşdırır”.

Busaat.az xəbər verir ki, bu barədə Mustazafan Fondunun filialı Sina Energy Gostar Holdinqin baş direktoru Məhəmməd Ziyar bildirib.

Məhəmməd Ziyar İranın Neft naziri Cavad Ovcinin bu yaxınlarda Rusiyaya səfəri zamanı Təbaş boru kəməri kimi tanınan Rəfsəncan-Məşhəd neft kəmərinin həyata keçirilməsində əməkdaşlıq etmək üçün imzalanmış sənədin təfərrüatlarını təqdim edib.

“Bu əməkdaşlıq sənədi Sina Energy Gostar Holdinq və dövlətə məxsus Promsyriyimport şirkəti arasında İran və Rusiyanın Birgə İqtisadi Komissiyasının iclasında imzalanıb. Sözügedən əməkdaşlıq sənədində əldə olunan razılaşmalara əsasən, Təbaş boru kəməri bu iki şirkət tərəfindən inşa ediləcək” –deyə, məlumatda qeyd olunub.

Əlavə edilib ki, danışıqlara əsasən Rəfsəncandan Məşhədə 948 kilometr uzunluğunda olan bu boru kəməri iki nasos stansiyası və üç terminalla birlikdə Sina Energy Gostar Holdinq və Rusiya firmasının əməkdaşlığı ilə EPC+F müqaviləsi çərçivəsində həyata keçiriləcək.

Onun sözlərinə görə bu layihənin həyata keçirilməsi dörd il çəkəcək və rusların bu layihə üçün maliyyə vəsaiti ayırması qərara alınıb. Bu kəmərin istismarı ilə sutkada 150 min barel neft məhsullarının vurulması mümkün olacaq.

Busaat.az