Kolumbiyada əməliyyat keçirən əsgərlərə silahlı hücum nəticəsində 4 nəfər həyatını itirib.
Busaat.az xəbər verir ki, bu barədə ölkənin Müdafiə Nazirliyi məlumat yayıb.
Bildirilib ki, Narino inzibati rayonunun Cumbitara şəhərinin kənd ərazisində təhlükəsizlik qüvvələri tərəfindən qanunsuz silahlı birləşmələrə qarşı əməliyyat keçirilib.
Yaranan qarşıdurmada 4 əsgərin öldüyü, bölgəyə əlavə qüvvələrin göndərildiyi və əməliyyatın davam etdiyi deyilib.
Kolumbiya mətbuatının məlumatına görə, hücumu tərksilah etməyən keçmiş Kolumbiyanın İnqilabçı Silahlı Qüvvələrinin (FARC) çətir təşkilatı Estado Mayor Central (EMC) həyata keçirib.
Kolumbiya Müdafiə Nazirliyi həyatını itirən əsgərlərin ailələrinə başsağlığı verib.
Qeyd edək ki, İvan Mordizko kimi tanınan Nestor Gregorio Vera tərəfindən idarə olunan və heç vaxt sülh müqaviləsində iştirak etməyən EMC, FARC-ın sözdə “Baş Qərargahı” kimi də tanınır.
Ölkə mətbuatının məlumatına görə, 2180-i silahlı olmaqla, 3500-dən çox üzvü olan EMC Venesuela və Ekvadorda, eləcə də Kolumbiyanın qərbində, ortasında və şərqində fəaliyyət göstərir və narkotik, qaçaqmalçılıq və qəsb yolu ilə maliyyələşməni həyata keçirir.
FARC ilə 50 ildən çox davam edən münaqişəyə son qoyan sülh sazişi Kolumbiya prezidenti Xuan Manuel Santos və FARC lideri Rodriqo Londono tərəfindən 2016-cı il noyabrın 24-də paytaxt Boqotadakı tarixi Kolon Teatrında imzalanıb.
Dövlət və FARC arasında sülh razılaşmasına baxmayaraq, təşkilatla ziddiyyət yaradan bəzi keçmiş komandirlər və FARC üzvləri silahlı aksiyalarını davam etdirirlər.
