Kreml: Vaşinqton nüvə silahlarını ABŞ ərazisinə qaytarmalıdır

“Gərginliyin və risklərin artdığı bu dövrdə nüvə dövlətləri eskalasiyanın qarşısını almaq üçün xüsusi məsuliyyəti daşıyır”.

Busaat.az xəbər verir ki, Rusiyanın ABŞ-dakı səfiri Anatoli Antonov Vaşinqtonu digər ölkələrə yerləşdirdiyi nüvə silahlarını ABŞ-a geri qaytarmağa çağırıb.

“Gərginliyin və risklərin artdığı bu dövrdə nüvə dövlətləri eskalasiyanın qarşısını almaq üçün xüsusi məsuliyyət daşıyır. Bununla belə, mən bir daha Vaşinqtonu xaricdə yerləşdirilən bütün nüvə silahlarını öz ərazilərinə qaytarmağa, onların saxlanması üçün xaricdəki infrastrukturu ləğv etməyə çağırıram. Administrasiya rəsmiləri ənənəvi olaraq bu silahları taktiki silahlar adlandırır və Rusiyanın analoji silah arsenalının ABŞ-dan bir neçə dəfə böyük olduğunu iddia edirlər. Bununla belə, onlar bizim bütün taktiki nüvə silahlarımızın Rusiyada mərkəzləşdirilmiş obyektlərdə saxlanması faktını açıqlamırlar və bu ABŞ üçün təhlükə yarada bilməz” -deyə, Antonov vurğulayıb.

“ABŞ-ın havadan atdığı bombalara gəlincə, onlar Rusiya sərhədinə yaxın Avropa ölkələrinə yerləşdirilir. Məhz buna görə də B61-12 bombaları məhdud imkanlara baxmayaraq, strateji əhəmiyyət kəsb edir. Bundan başqa, ABŞ Silahlı Qüvvələri NATO tərəfdaşları ilə birlikdə mütəmadi olaraq bu silahların tətbiqi üzrə təlimlər keçirir. Bu cür təlimlər hazırda “Steadfast Noon” təliminin bir hissəsi kimi keçirilir. Şimali Atlantika alyansının rəhbərliyi iddia edir ki, fəaliyyət Rusiyaya hücum məqsədi daşımır. O zaman sual olunur ki, alyans öz strateji konsepsiyasında təhlükəsizliyinə “ən mühüm və birbaşa təhdid” kimi qələmə verilən Rusiya olduğu halda, nüvə silahından kimə qarşı istifadə edəcək?” – deyə, Rusiya səfiri əlavə edib.