“Türkiyədən gətirilən məhsulların həcmi artacaq, qiymətində isə müəyyən azalmaları müşahidə edə bilərik.”
Bu sözləri türk lirəsinin dəyərdən düşməsinin ölkəmizlə iqtisadi əlaqələrinə təsirini şərh edən Natiq Cəfərli Busaat.az-a açıqlamasında deyib.
İqtisadçı bildirib ki, türk lirəsinin dəyərdən düşməsi Türkiyənin özünün daxilində olan xarici, iqtisadi problemlərdən qaynaqlanır. Turizm mövsümünün yaxşı keçməməsi və valyuta gəlirlərindən məhrum olması kimi bir çox səbəblər nəticə etibarilə türk lirəsinin ucuzlaşmasına təsir göstərdi.
“Əlbəttə ki, bu müəyyən dərəcədə qonşu ölkələrə, eləcə də Azərbaycana da təsirləri olacaq. İlk növbədə Türkiyənin ixracatında müəyyən artım ola bilər. Yəni Azərbaycana daha çox türk mallarının gətirilməsi gözlənilir. Çünki türk lirəsi ucuzlaşdıqca ölkəmizə idxal artır. Ancaq bu hələki qiymətlərə təsir göstərmir. Əslində Türkiyədən gələn məhsulların qiymətləri də ucuzlaşmalıdı. Bir müddətdən sonra türk lirəsi bu cür aşağı məzənnədə qalsa, o zaman Türkiyədən gətirilən məhsulların həcmi artacaq, qiymətində isə müəyyən azalmaları müşahidə edə bilərik.
Türkiyədə lirənin dəyərdən düşməsi ölkədə məzənnə gərginliyi yaratsa da, ölkəmizdə Azərbaycan manatına elə də ciddi problem yaratmır. Çünki, neft qiymətləri yüksəkdir və neft qiymətlərinin yüksək olması manatın məzənnəsinə dəstək verən əsas amildir.”
Nərmin Kərim
