Türkiyənin xarici işlər naziri Mövlud Çavuşoğlu Türkiyə ilə Misir arasında diplomatik təmasların başlandığını söyləyib. Busaat.az xəbər verir ki, Çavuşoğlu danışıqların yol xəritəsi çərçivəsində davam etdiyini bildirib.
“Misirlə danışıqlara start verilib. Kəşfiyyat səviyyəsində danışıqlar davam edərkən, diplomatik əlaqələr də qurulub. Misirlilərdən bu anda heç bir ilkin şərt və ya bizdən hər hansısa bir şərt irəli sürülməyib. Çünki uzun illər münasibət sabit olmadığı üçün bir gündə heç nə olmamış kimi davranmaq o qədər də asan deyil”-deyə, Türkiyənin XİN başçısı vurğulayıb.
Çavuşoğlu açıqlamasında Səudiyyə Ərəbistanı və Birləşmiş Ərəb Əmirlikləri ilə bağlı da mesajlar verib: “Əbu-Dabidən daha çox müsbət mesajlar görürük. Türkiyəyə qarşı mənfi kampaniyanı azaldıblar. Bzim də bu ölkələrlə heç bir problemimiz yoxdur. Vaxtı ilə bizə mənfi münasibət göstərsələr də, hazırda bu ölkələrlə problemimiz yoxdur”.
Çavuşoğlu ABŞ-la aparılan “S-400” danışıqlarına da münasibət bildirib: “Amerikalılarla heç vaxt hər hansı bir model haqqında danışmamışıq. Sadəcə, “S-400”, YPG/PKK məsələsi deyil, digər məsələləri də müzakirə etməyin lazım olduğunu demişik. Təbii ki, bu kimi məsələləri telefonda müzakirə etmək də doğru olmaz”.
