Moldova parlamenti cinayət məcəlləsinə ərazi toxunulmazlığına xələl gətirən hərəkətlərə təhrik etməyə görə cəza nəzərdə tutan düzəlişləri ikinci oxunuşda qəbul edib.
Busaat.az xəbər verir ki, bunu qanunverici orqanın mətbuat xidməti bildirib.
Parlamentin saytında deyilir ki, xarici kəşfiyyat xidmətlərinin Moldovaya qarşı təxribat xarakterli informasiya hərəkətləri nəticəsində yaranan risk və təhdidlərlə mübarizə məqsədilə cinayət məcəlləsinə dəyişiklik edilib.
Təşəbbüs 60 deputatın səsi ilə təsdiqlənib. Sənəd Moldova ərazisində qanunsuz informasiya strukturlarının yaradılmasına görə cəza nəzərdə tutur. Moldovanın suverenliyinə, müstəqilliyinə, ərazi bütövlüyünə, milli təhlükəsizliyinə və ya müdafiəsinə xələl gətirən hərəkətlərə çağırışa görə cinayət məsuliyyəti nəzərdə tutulub. Moldovanın cinayət məcəlləsində yeni maddələr, xüsusən də “Moldovaya qarşı sui-qəsd” (2 ildən 7 ilədək həbs) və separatizmlə bağlı maddələr olacaq.
Tanınmamış Dnestryanı ərazinin “Xarici İşlər Nazirliyinin rəhbəri” Vitali İqnatyev dəfələrlə qeyd edib ki, təklif olunan qanun layihəsi Dnestryanı nizamlama üzrə danışıqlar prosesinə təhlükədir.
