Mingəçevirdə müəllim Zəminə Qarayevaya qarşı aparılan kampaniya narahatlıq doğurur – məsələ obyektiv və çoxşaxəli şəkildə araşdırılmalıdır!
Müəllim Zəminə Qarayeva uzun illərdir təhsil sahəsində çalışır və pedaqoji fəaliyyətində daim məsuliyyətli və peşəkar yanaşması ilə tanınıb. Hal-hazırda Mingəçevir şəhəri 14 nömrəli məktəbdə fəaliyyət göstərən bu müəllimə qarşı son günlərdə əsassız və məqsədli qarayaxma kampaniyası aparılır. Sosial şəbəkələrdə onun diplomunun guya saxta olması ilə bağlı heç bir sübuta əsaslanmayan iddialar yayılır.
Əlavə olaraq, məktəb daxilində onun vəzifəsindən uzaqlaşdırılması məqsədilə imza toplandığı da bildirilir. Xüsusilə narahatedici məqam odur ki, bu imza kampaniyasına məktəbdə fəaliyyət göstərən Azad Həmkarlar İttifaqı nümayəndəsi də qoşulub. Bu isə həm əmək hüquqları, həm də həmkarlar həmrəyliyi prinsipləri baxımından ciddi narahatlıq doğurur.
Mövqeyimiz aydındır: məsələ yalnız Mərkəzi-Aran Regional Təhsil İdarəsi səviyyəsində deyil, Məktəbəqədər və Ümumtəhsil üzrə Dövlət Agentliyi tərəfindən də araşdırılmalı, obyektivlik tam şəkildə təmin olunmalıdır.
Eyni zamanda, Azərbaycan Həmkarlar İttifaqları Konfederasiyası (AHİK) bu məsələni diqqətə almalı, həmkarlar ittifaqı nümayəndəsinin bu cür proseslərə cəlb olunması ilə bağlı münasibət bildirməlidir. Həmkarlar ittifaqının əsas missiyası əməkdaşın yanında olmaqdır – ona qarşı kampaniyada yer almaq deyil.
Təhsildə şəffaflıq, hüquq və ləyaqət prinsipləri qorunmalıdır. Bu məsələdə susmaq tərəfsiz qalmaq deyil – susmaq haqsızlığın bir parçası olmaq deməkdir.
Əmrah Həsənli
Təhsil eksperti
