“Onsuz da bu gün sakinlərin sıx məskunlaşdığı Bakıda ekoloji vəziyyət elə də ürək açan deyil. Şəhərdə çox ciddi çirklənmə müşahidə olunur ki, bildiyimiz kimi, buna da səbəb avtomobillərin və sənaye müəssisələrinin olması, eyni zamanda çoxmərtəbəli binaların inşa edilməsidir. Təbii ki, sıxlıq olan yerdə ekoloji çirklənmə qaçılmazdır. Bu da azmış kimi, şadlıq evləri və restoranlar şəhərin daxilində yerləşir və hər gün bu obyektlər havaya külli miqdarda tüstü buraxır”.
Bu fikri Busaat.az-a özəl açıqlamasında sosioloq Elçin Bayramlı bildirib.
E.Bayramlının fikrincə, şəhər mərkəzində bu tip obyektlərin fəaliyyətinə icazə verilməməlidir. Və yaxud da ki, kafe və restoranlarda xüsusi filtirli havalandırma sistemi quraşdırılmalıdır. Bu zaman həmin obyektlərdən havaya qalxan tüstünün miqdarı xeyli azalmış olacaq.
“Düşünürəm ki, ekoloji çirklənmənin qarşısını almaq üçün iki yoldan biri seçilməlidir- ya qeyd etdiyimiz obyektlər şəhərdən kənara köçürülməli, ya da xüsusi filtirli havalandırma sistemi tətbiq olunmalıdır”, – sosioloq qeyd edib.
