Sürücüləri narazı salan dövlət qurumları: "Nəqliyyat sektoruna yaraşmayan bir vəziyyətdir"

Bu gün Bakıda 4 yük maşını Heydər Əliyev prospektində yolu bağlayıb. Sürücülər gecədən etibarən maşınlarını yolda saxlayıblar. “R-Group” şirkətinin sürücüləri yük avtomobillərinin üzərinə bu sözləri yazıblar: “Bizi bu həddə çatdıran Dövlət Avtomobil Nəqliyyatı Xidmətinin rəisi Anar Rzayev və şöbə müdiri Malik Əliyev! İcazə vərəqələrini verin. Məhsullar xarab olmaq üzrədir. Müflis olmuşuq!”.

Mövzu ilə bağlı nəqliyyat eksperti Aslan Əsədov Busaat.az–a açıqlamasında bildirib ki, bugünkü aksiya ciddi mesajdır və aidiyyatı qurumlar bu vəziyyətdən dərs çıxarmalıdır:

“Bu gün baş verən etiraz aksiyası xoşagəlməz haldır. Bu, ölkənin nəqliyyat sektoruna yaraşmayan bir vəziyyətdir. Nəqliyyat sektorunda problem təkcə sürücülərlə bağlı deyil. Çünki idarəetmə sistemində müəyyən nöqsanlar mövcuddur. Dövlət hər hansısa qurum yaradanda daha çevik və keyfiyyətli idarəetməni nəzərdə tutur. Təəssüf ki, əksər məmurlar bu prinsiplərə əməl etmirlər. Ümid edirəm ki, məlum etiraz aksiyası bir mesaj olacaq və səlahiyyətli şəxslər bundan sonra məsuliyyətli davranacaqlar”.

Busaat.az