Azərbaycanda sürücülük vəsiqələrinin verilməsi mexanizmində dəyişiklik ediləcəyinə dair iddialar yayılıb.
Busaat.az xəbər verir ki, əhali arasında yayılan məlumatlara əsasən, yaxın gələcəkdə ilk dəfə verilən sürücülük vəsiqələri də ASAN xidmət vasitəsilə təqdim olunacaq.
Mövcud qaydalara görə, ASAN xidmət sürücülük vəsiqəsinin dəyişdirilməsi xidmətini göstərir. İlk dəfə sürücülük vəsiqəsi almaq istəyənlər isə Respublika Baş Dövlət Yol Polisi İdarəsinə üz tutmalıdır.
İddiaya əsasən, yeni qaydalarda ilk dəfə sürücülük vəsiqəsi almaq istəyənlər də ASAN xidmətə müraciət edəcəklər. Lakin bunun üçün zəruri sənədlərin əldə edilməsi də tələb olunacaq. Həmin zəruri sənədlər Dövlət İmtahan Mərkəzindən (DİM) və Respublika Baş Dövlət Yol Polisi İdarəsindən alınacaq.
İddialara görə, sürücülük hüququnun əldə edilməsi üçün nəzəri imtahanları DİM, nəqliyyat vasitəsini idarəetmə vərdişi imtahanını isə yol polisi götürəcək.
Hazırda mövcud qaydalara əsasən, sürücülük vəsiqəsinin alınması üçün vətəndaşlar Baş Dövlət Yol Polisi İdarəsinə və ya onun yerli bölmələrinə müraciət edir, qeydiyyatdan keçərək nəzəri və praktiki imtahanlarda iştirak edirlər. İmtahanlardan uğurla keçən şəxslərə sürücülük vəsiqəsi verilir.
Qeyd edək ki, rəsmi qurumlar bu məlumatla bağlı hələlik heç bir açıqlama verməyib.
