Fizika-riyaziyyat elmləri doktoru, professor Qüdrət İsaqov Daxili İşlər naziri Vilayət Eyvazova müraciət edib.
Busaat.az xəbər verir ki, o, müraciətində mənzilində rahat yaşaya bilmədiyini, binanın zirzəmisindəki restoranın səs-küyündən ailəlikcə narahat olduqlarını bildirib:
“Gecə saat 2-nin yarısı Sizə yenə də müraciət edirəm! Hörmətli nazirimiz! indi gecə saat 2-nin yarısıdır. Zirzəmimiz dolu insanlarladır. Polislər gəldi, getdi. Hamı yenə də zirzəminin içində qaldı. Yəni polisin gəlib-getməyinin bir xeyri olmadı. Sizdən xahiş edirəm, birbaşa özünüz bu işlərə qarışasınız. Belə yaşamaq, yaşamaq deyil. Bu bir zülümdür. Bizi bu zülümdən xilas edin.
Hörmətli nazirimiz, Vilayət Eyvazov! Mən ailəmlə birlikdə Binəqədi rayonu, Naxçıvani küç.39A saylı binanın 1-ci mərtəbəsində 3 saylı mənzildə yaşayıram. Mənzilimizdən çıxıb kirayə mənzil tutmağa hazırlaşıram. Çoxmənzilli binaların zirzəmilərinin icarəyə verilməsi və ya özəlləşdirilməsi qadağan olunsa da zirzəmimizdəki səs-küydən istirahət hüququmuz yerli-dibli yoxa çıxıb!”
Professor qeyd edib ki, dözülməz səs-küydən elmlə, işləri ilə məşğul ola bilmirlər:
“Mənzilimizin altındakı restoranın dözülməz səs-küyündən elmlə məşğul ola bilmirəm. Həyat yoldaşım jurnalistdir. Azərbaycanda çap olunan dərsliklərin yarısından çoxunun redaktorudur. Yazıçılar ittifaqının üzvüdür. Mən insan kimi yaşamaq, insan kimi istirahət etmək istəyirəm. Təəssüflər olsun ki, səs-küydən öz mənzilimdən çıxıb getmək istəyirəm. Sizi ictimai asayişin qorunmasında böyük işlər görən bir nazir kimi tanıyıram. Ona görə bu məktubu sizə yazdım. Əlavə olaraq bildirirəm ki, mənzilimizin altındakı zirzəmidə yerləşən restoranın sahibi zirzəminin bütün yükdaşıyan divarlarını dağıdıb. Bu səbəbdən Fövqəladə Hallar Nazirliyi binamızın aşağı ballı zəlzələlər və seysmiki təsirlər nəticəsində binamızın uçub-dağıla biləcəyi haqqında aktlar yazıb. Sizdən xahiş edirəm, zirzəmimizdə toplaşan çoxsaylı insanların səs-küyündən bizi xilas edəsiniz!”/Bakupost.az
