Yoldaşı vəfat edəndən sonra evlənsə belə, uşağına baxan ata pensiyaya tez çıxacaq.
Bu, Milli Məclisin Əmək və sosial siyasət komitəsinin bugünkü iclasında birinci oxunuşda müzakirəyə çıxarılan “Əmək pensiyaları haqqında” qanuna dəyişiklik layihəsində əksini tapıb.
Yeni dəyişikliyə əsasən, kişilərə münasibətdə qadın vəfat etdiyi və uşağın kişinin himayəsində olduğu və növbəti ailə qurduğu halda da kişilərin tələb olunan şərtlər daxilində 5 il erkən pensiya hüququ tanınacaq.
Bu qərar hansı hallarda tətbiq olunacaq? Həmin uşaq kişinin 60 yaşı olan zaman azyaşlı olmalıdır yoxsa ümumi ömründə anasız uşaq saxlayan atalara aid ediləcək bu qərar? Bu könüllü şəkildə olacaq yoxsa həmin şəxsin 60 yaşının tamamında pensiyaya çıxması mütləqdir?
Məsələ ilə bağlı hüquqşünas Ramil Süleymanov Referans.az-a açıqlamasında danışıb.
“ “Əmək pensiyaları haqqında” qanunun 8-ci maddəsinə görə, 5 və daha çox uşaq dünyaya gətirib, övladlığa götürüb, qəyyumluğa götürüb onu 18 yaşına qədər tərbiyə eləmiş şəxslər digərlərindən 5 il az olmaqla əmək pensiyası hüququnu əldə etmək hüququna malikdirlər. Eyni zamanda bildirmək istəyirəm ki, Azərbaycan Respublikasının “Əmək pensiyaları haqqında” qanununun 8.3.-cü maddəsinə görə, əgər ana vəfat edərsə, ana ilə nikaha xitam verilərsə və ya ana valideynlik hüququndan məhrum olunarsa 5 və daha çox uşağı və ya əlilliyi müəyyən olunmuş uşağı növbəti nikahı bağlamadan təkbaşına böyüdən atalar uşağın 8 yaşı tamam olana qədər 5 il azaldılmaqla yaşa görə əmək pensiyasına çıxmaq hüququ qazanırlar”.
