Yeni ilə hazırıqmı: “Bu il qiymətlər öyrəşdiyimizdən daha yuxarı olacaq” - EKSPERT RƏYİ

“Tələbatın çox olduğu ərzaq məhsullarında ortalama 10-15% qiymət artımı müşahidə olunacaq”.

Bunu “yeni il qabağı qiymət artımı olacaqmı?” sualını cavablandıran iqtisadçı ekspert Toğrul Vəliyev Busaat.az-a açıqlamasında deyib.

O bildirib ki, bazar iqtisadiyyatında yeni il qabağı qiymət artımı normal praktikadır: “Bəzən məhsulun növündən asılı olaraq qiymət azalması da baş verə bilir. Yeni il bayramı üçün istifadə olunan ərzaq məhsullarında qiymət artımı gözlənilir. Qiymət artımı hər zaman sünidir, təbii hadisə deyil. Artım baş verəcək və davam edəcək. Lakin bizi maraqlandıran sual artım səviyyəsinin nə qədər olacağıdır”.

Ekspert qiymət artımının səbəblərini belə izah edib: “Bir sıra amillərdən asılı olaraq qiymətlərdə artım və ya azalma müşahidə edilir. Ötən ilin dekabr ayı ilə müqayisədə heç bir dəyişiklik baş verməyib. 2021-ci il dekabr ayında yaşanan ciddi qiymət artımı bu il də baş verəcək. Hesablama palatası daimi olaraq öz rəyində bildirir ki, dövlət büdcəsi xərclərinin ilin son rübündə keçirilməsi inflyasiyaya təsir edir. Düşünürəm ki, bu il qiymətlər öyrəşdiyimizdən daha da yuxarı olacaq. İnsanların tələbatı olan ərzaq mallarında ortalama 10-15% qiymət artımı müşahidə olunacaq”.

Busaat.az/Ələsgər