Azərbaycanda son sutka ərzində 182 nəfər “COVID-19”a yoluxub, 145 nəfər sağalıb, 2 nəfər vəfat edib. Son günlər bir qədər arxa plana atdığımız “COVID-19” bir sıra ölkələrdə ikinci baharını yaşamaqdadır. Yerli mütəxəssislər əhaliyə müraciət edərək təhlükəsizlik tədbirlərinə bir daha diqqət çəkiblər.
Busaat.az xəbər verir ki, TƏBİB-in infeksion xəstəliklər üzrə İşçi Qrupunun üzvü Nəzrin Mustafayeva “Real TV” yə açıqlamasında bildirib ki, qətiyyən arxayınlaşmaq olmaz: “Bəzi qonşu ölkələrdə, həmçinin bir sıra Avropa ölkələrində yoluxma statistikasına nəzər salsaq, artımın baş verdiyini görərik. Hətta son həftələr ərzində Fransa, Niderland, Böyük Britaniya kimi ölkələrdə ilk dalğa dediyimiz dövrlə – mart, aprel, may aylarındakı gündəlik yoluxma sayından daha çox rəqəmlər müşahidə olunur. Bu onu göstərir ki, tədbirli davranmaq lazımdır. Ölkədə vəziyyət nə qədər stabil olsa belə, artım müşahidə olunmasa da, bu o demək deyil ki, hər zaman belə olacaq. Biz öz tədbirlərimizi görməliyik, sığortalı şəkildə davranmalıyıq”.
Mövsüm dəyişdikcə, infeksion xəstəliklərin yayılma riski də yüksək olur. Havalar soyuduqca insanlar daha çox qapalı məkanlara üz tuturlar. Belə məkanlarda nəfəsliyin bağlı qalması bir çox hallarda xəstəliklərin inkişafına zəmin yaradır.
Səhiyyə Nazirliyinin Baş infeksionisti Təyyar Eyvazovun sözlərinə görə, həm mövsümi qrip, həm də koronavirusdan qorunmaq üçün aylardır verilən tövsiyələrə əməl etmək lazımdır: “Biz payız-qış mövsümünə daxil oluruq. Hava soyuyur, insanların immuniteti aşağı düşür. Belə şəraitdə yoluxma ehtimalı da daha çoxdur. Digər respirator xəstəliklərin də dövrü gəlir. Hazırda dövlətimizin əsas fikri Qarabağ cəbhəsindədir. Amma bu da bir cəbhədir. Mən xalqımızdan xahiş edirəm ki, arxa – koronavirus cəbhəsində özlərini elə aparsınlar ki, dövlətimiz gücünü Qarabağa yönəldə bilsin. Baxmayaraq ki, sağalanların sayı çoxdur, aktiv xəstələrin sayı azalmaqda davam edir, bunu unutmaq olmaz. ÜST-ün Azərbaycan ofisi də bununla bağlı xalqa müraciət edib. Aylardır tövsiyə olunan sadə tədbirlərə əməl olunmalıdır – maska taxılmalı, sosial məsafə gözlənməlidir. Buna ciddi riayət olunsa, dövlətimiz hər iki cəbhədə uğur qazana bilər”.
Qeyd edək ki, indiyə qədər Azərbaycanda 40 min 931 nəfər koronavirusa yoluxub. Onlardan 38 min 713 nəfəri sağalıb, 600 nəfər isə vəfat edib.
