“Aprelin 6-da Brüsseldə Avropa İttifaqı Şurasının rəhbəri Şarl Mişelin Azərbaycan prezidenti İlham Əliyev və Ermənistanın baş naziri Nikol Paşinyanla görüşü planlaşdırılır. Düşünürəm ki, bu görüş həlledici ola bilər”.
Bu fikirləri Busaat.az-a açıqlamasında siyasi şərhçi Tehran Orucoğlu səsləndirib. O bildirib ki, Avropa İttifaqı Qarabağdakı prosesləri yaxından izləyir.
“Avropa İttifaqı ilə Azərbaycan müsbət əlaqələri var. İttifaqın Prezidenti ilə Azərbaycan Respublikasının Prezidenti dəfələrlə görüşlər keçirib. Bu görüşlərin hər biri Azərbaycanın mənafeyinə tam uyğun olub. Avropa İttifaqının Cənubi Qafqaz regionunda sülhü təmin etmək üçün vasitəçi olması başadüşüləndir. Həmçinin ittifaq Qarabağda son yaşananları yaxından izləyir. Azərbaycan ordusunun antiterror əməliyyatları son günlər dünya mediasında yer alır ki, Aİ sülh müqaviləsinin imzalanması üçün şəraitin yarandığını başa düşür. Təbii ki, Azərbaycan diqtə edən tərəf olaraq qalmaqdadır. Sülh müqaviləsi Azərbaycan torpaqlarından silahlı quruplaşmaların tam çıxarılmasından sonra mümkün olacaq. Həmçinin Ermənistanın Azərbaycana qarşı ərazi iddiası olmayacağı təqdirdə yekun nəticə əldə edilə bilər. Ermənistan baş nazirinin təhlükəsizlik şurası ilə keçirdiyi iclas zamanı sülh müqaviləsinin bağlanmasının vacibliyi ilə bağlı səsləndirdiyi fikirlər nikbin düşünməyə imkan verir. 6 aprel tarixində reallaşacaq görüş tarixi ola bilər”.
Ariz Həsənoğlu
Busaat.az
