Ağ Evdən Kremlə cavab: "Gülməlidir"
Ağ Ev pilotsuz uçuş aparatları (PUA) ilə Kremlə edilən hücumların arxasında Vaşinqtonun dayandığına dair iddiaları “gülünc” adlandırıb və ABŞ-nin bu hücumlarda iştirakının olmadığını bildirib.
Busaat.az xəbər verir ki, Ağ Ev Milli Təhlükəsizlik Şurasının Strateji Kommunikasiyalar Koordinatoru Con Kirbi qatıldığı müxtəlif televiziya proqramlarında dronlarla (PUA) Kremlə edilən hücumlarla bağlı açıqlamalar verib.
Kremlin sözçüsü Dmitri Peskovun, “Belə qərarlar Kiyevdə deyil, Vaşinqtonda verilir”, – açıqlamasına, eyni zamanda PUA-larla edilən hücumlarda ABŞ-ni ittiham etməsinə gəlincə, Kirbi Peskovun “yalan danışdığını” deyib.
Kirbi qeyd edib: “Aydındır ki, bu gülünc bir iddiadır. ABŞ-nin bununla heç bir əlaqəsi yoxdur”. O, hücumların arxasında kimin olduğunu bilmədiyini deyib.
Liderlərə qarşı hücumları bəyənmədiklərini ifadə edən Kirbi, Ukraynanın öz ərazisi xaricində hücumlarını dəstəkləmədiklərini bildirib.
ABŞ-li diplomat həmçinin vurğulayıb ki, başqasının ərazisində hərbi əməliyyatlar edən və işğal siyasəti gerçəkləşdirən tərəf Rusiyadır.
Busaat.az
