Avropa İttifaqı (Aİ) ölkələrinin xarici işlər nazirləri Rusiyanın 300 min hərbçini ordu sıralarına çağırmasını nəzərdə tutan səfərbərlik qərarından və Ukraynadakı separatçıların referendumla bağlı bəyanatından sonra Nyu-Yorkda fövqəladə iclas keçirəcək.
Busaat.az xəbər verir ki, fövqəladə iclası Avropa İttifaqının Xarici Əlaqələr və Təhlükəsizlik Siyasəti üzrə Ali Nümayəndəsi Cosep Borrel çağırıb. Borrel jurnalistlərə açıqlamasında bildirib ki, görüşdə ortaq qərarlar qəbul etməyi hədəfləyirlər.
“Biz əyilməyəcəyik, Ukraynanın suverenliyi və demokratiyasının müdafiəsini tam dəstəkləməyə davam edəcəyik”, – deyə Borrell qeyd edib. Rusiya prezidenti Vladimir Putinin səfərbərlik bəyanatında nüvə silahından istifadə ilə bağlı hədələrə diqqət çəkən Borrel, bu cür təhdidlərin qəbuledilməz olduğunu bildirib: “Nüvə silahı ilə təhdid bütün dünya üçün real təhlükədir. Beynəlxalq ictimaiyyət buna reaksiya göstərməlidir”.
Busaat.az
