Azərbaycan və Ermənistan arasında sülhün yeganə real yolu liderlərin qəbul etdiyi bəyannamələrin bütün müddəalarının tərəflər tərəfindən ciddi şəkildə yerinə yetirilməsidir.
Busaat.az xəbər verir ki, bu barədəRusiya prezidenti Putin Kollektiv Təhlükəsizlik Müqaviləsi Təşkilatının (KTMT) Kollektiv Təhlükəsizlik Şurasının növbədənkənar onlayn iclasında çıxış edib.
Rusiyanın Bakı ilə İrəvan arasında münasibətlərin hərtərəfli normallaşması üçün əlindən gələni etdiyini qeyd edən Putin, Azərbaycan və Ermənistan arasında problemlərin sülh yolu ilə həllinə hər zaman töhfə verməyə hazır olduqlarını bildirib.
“Ümumiyyətlə, biz Cənubi Qafqazda sakit və daimi inkişafı dəstəkləyirik. Şübhəsiz ki, sülhə aparan yeganə mümkün və real yol Rusiya, Azərbaycan və Ermənistan liderlərinin də imzaladığı məlum birgə bəyannamənin bütün müddəalarının ciddi şəkildə həyata keçirilməsi ola bilər” – deyə, Putin bildirib.
Azərbaycan-Ermənistan sərhədinin müəyyənləşdirilməsi, nəqliyyat əlaqələrinin bərpası və humanitar problemlərin həlli ilə bağlı bu sazişlərin ardıcıl icrası sayəsində Azərbaycan və Ermənistan arasında münasibətlərin stabil normallaşmasının təmin edilməsinin mümkün olduğunu vurğulayan Putin, bunu Ermənistanın baş naziri Nikol Paşinyanla dəfələrlə müzakirə etdiklərini və Paşinyanın bununla tam razı olduğunu bildirib.
