Bütün əməkdaşları işdən uzaqlaşdırılıb - “Lider” TV-də nə baş verir?

“Lider” telekanalında çalışan bütün əməkdaşlar işdən uzaqlaşdırılıb.

Busat.az xəbər verir ki, bu barədə Oxu.Az-a telekanalda çalışan əməkdaşlardan bir neçə nəfər məlumat verib. Onların sözlərinə görə, rəhbərlik birmənalı şəkildə işçilərdən ərizə yazaraq, məzuniyyətə çıxmalarını tələb edib.

Başqa çıxış yollarının olmadığını deyən işçilər məzuniyyətlə bağlı ərizə yazıblar. Ötən ay üzrə əməkhaqlarının verilmədiyini bildirən əməkdaşlar rəhbərliyin bu barədə onlara dəqiq bir söz də demədiyini qeyd ediblər.

İşçilərin böyük hissəsi işdən kənarlaşdırılıb, texniki heyətdən bir neçə əməkdaş saxlanılıb. Bəzi əməkdaşlara isə keçən həftənin şənbə günündən işə gəlməmələri tapşırılıb.

Eyni zamanda, telekanal əməkdaşlarına nə ötən ayın maaşlarının, nə də kompensasiyanın verilib-verilməyəcəyinə dair heç bir söz söylənilməyib.

Telekanal əməkdaşlarının sözlərinə görə, hər kəsin zorla məzuniyyətə göndərilməsinə səbəb “Lider” TV-də yaşanan maliyyə problemləridir.

Telekanalın proqram rəhbəri isə Yenicag.az-a açıqlamasında xəbəri nə təsdiq, nə də təkzib edib. Cavab qısa və konkret olub:

“Telekanal bununla bağlı rəsmi açıqlama yaymayıb”.