“Napoli”nin hücumçusu Viktor Osimhen karyerasını İngiltərədə davam etdirə bilər.
Busaat.az xəbər verir ki, bu barədə Todofichajes məlumat yayıb.
Mənbənin sözlərinə görə, “Çelsi” 24 yaşlı nigeriyalı forvardın yanına qayıdıb. London klubu yeni mərkəz hücumçusu axtarır. Komanda rəhbərliyi Osimheni ideal namizəd hesab edir. Qeyd olunur ki, “Çelsi” futbolçu üçün təxminən 170 milyon avro ödəməyə hazırdır.
Daha əvvəl Neapolitan klubunun sosial şəbəkələrində hücumçu ilə bağlı yumoristik videonun yayılmasına görə Osimhen və “Napoli” arasında münaqişə yarandığı məlum olub. Hücumçunun agenti sosial şəbəkələrdə yayımlanan nigeriyalının penaltidən yayındığı videoya görə məhkəməyə müraciət edə biləcəyini bildirib.
Bu mövsüm Osimhen “Napoli”nin heyətində bütün turnirlərdə 7 oyun keçirib və bu matçlarda 4 qol və bir məhsuldar ötürmə edib.
