"Düşünürəm ki, ən qısa zamanda Xankəndində Azərbaycan bayrağının dalğalanmasının şahidi ola biləcəyik..."

Sülh danışıqları istiqamətində Ermənistan dövləti nə vaxt və hansı situasiyada öz öhdəliklərini icra edəcək? Əgər danışıqlar yenə də uzansa, Azərbaycanla Ermənistanın şərti sərhədində ölkəmiz tərəfindən hərbi əməliyyatlar keçirilə bilərmi? 

Mövzu ilə bağlı Millət vəkili Naqif Həmzəyev Busaat.az-a açıqlama verib:

“44 günlük Vətən müharibəsindən sonra Azərbaycan regionda uzunmüddətli və dayanıqlı sülhün əldə olunması üçün Ermənistana sülh əlini uzatdı. Amma təəssüflər olsun ki, bu müddət ərzində Ermənistan bu üzərinə götürdüyü öhdəlikləri və verdiyi sözləri yerinə yetirmir. Nəticə etibarilə sülh prosesi uzanır. Ancaq  Azərbaycan Prezidenti cənab İlham Əliyevin 28 may tarixində Laçında keçmiş məcburi köçkünlərin öz doğma yurdlarına qayıtması ilə əlaqədar sakinlərlə görüşü zamanı səsləndirdiyi fikirlərdən belə qənaətə gəlmək olar ki, Azərbaycan sonuncu həmlələrini də etməyə hazırdı. Sadəcə hələlik Azərbaycan səbr edir. Ermənistana və xüsusilə də separatçılara sonuncu şans vermək qərarındadı. Bu şansı da Prezident özü səsləndirdi. Əgər separatçılar yaradılmış bu imkanı düzgün dəyərləndirsələr və silahı yerə qoyub Azərbaycan torpaqlarını tərk etsələr, tutduqları qondarma vəzifələrdən imtina etsələr, o zaman anti – terror əməliyyatı olmadan həmin ermənilərin Azərbaycana inteqrasiyası baş tuta bilər.

Moldovadakı beştərəfli görüşdən sonra iyunun 21 – də Brüsseldə üçtərəfli görüşün keçirilməsi hər kəsə məlum oldu. Moldova görüşündə bu görüşə yaxşı bir zəmin olduğu da vurğulandı. Ehtimal var ki, Brüssel görüşündə Paşinyan real addımlar ata bilsin, konkret olaraq yeni bəndlər ətrafında razılıqlar əldə olunsun. Düşünürəm ki, əgər belə bir irəliləyiş əldə edilərsə anti – terror əməliyyatı olmadan Xankəndi və ətraf ərazilərdəki separatçıların oradan çıxmasının şahidi ola bilərik. Əks təqdirdə isə hər an Azərbaycan hərbi əməliyyatlar keçirə bilər. Bu Azərbaycanın suveren haqqıdır. Necə ki, Azərbaycan 2 il yarımdan çox müddət ərzində Ermənistanı sülhəməcburetmə siyasətini həyata keçirə bildi. Və bu siyasətin nəticəsi olaraq artıq Paşinyan çəkinmədən Azərbaycanın ərazi bütövlüyünü tanıdığını elan edir. Düşünürəm ki, bu siyasət davam etdiriləcək. Ən qısa zamanda biz Xankəndində Azərbaycan bayrağının dalğalanmasının şahidi ola biləcəyik…”

Bünyamin Bünyadzadə

Busaat.az