Ərdoğan NATO sammitində Qarabağda minalanmış ərazilərdən danışacaq

Türkiyə Prezidenti Rəcəb Tayyib Ərdoğan NATO sammiti çərçivəsində edəcəyi ikitərəfli görüşlərdə Qarabağda minalanmış ərazilərlə bağlı məsələni gündəmə gətirəcək.

Busaat.az xəbər verir ki, bu barədə Ərdoğan Burhaniye Şehriban Hatun məscidinin açılış mərasimində jurnalistlərin suallarını cavablandırarkən bildirib.

“NATO sammitində erməni məsələsi müzakirə ediləcəkmi?”, – sualına Türkiyə Prezidenti belə cavab verib: “Oradakı ikitərəfli görüşlərdə Ermənistan məsələsi gündəmə gəldikdə, bunların hamısını müzakirə edəcəyik. Minalar mövzusunda məsələ ilə əlaqəli olanlara deyəcəyik ki, əvvəlcə bu məsələni həll edək”.

Qeyd edək ki, NATO sammiti iyunun 14-də Brüsseldə keçiriləcək. Sammit 2,5 saatlıq bir iş sessiyasından ibarət olacaq ki, bu da son 20 ildə NATO-nun ən az davam edən tədbiri kimi tarixə düşəcək. Alyansın zirvə görüşləri adətən iki gün davam edir və bir neçə saat davam edən üç-dörd iş sessiyasından ibarət olur. Buna bənzər qısa bir zirvə 2002-ci ildə İtaliya Hərbi Hava Qüvvələrinin bazasında reallaşıb.