Rusiya Ermənistanın Qarabağın təhlükəsizliyinə görə məsuliyyəti üçüncü ölkələrin üzərinə atmaq cəhdlərini Ermənistan hakimiyyətinin vicdanına həvalə edir.
Busaat.az xəbər verir ki, bunu Rusiya Xarici İşlər Nazirliyinin sözçüsü Mariya Zaxarova bildirib.
“Biz Ermənistan rəhbərliyinin səsləndirdiyi fikirləri 2022-ci ilin oktyabrında Aİ-nin himayəsi ilə Praqada keçirilən sammit zamanı qəbul edilən kursun davamı kimi qiymətləndiririk. Beləliklə, Qarabağın taleyinə görə məsuliyyəti üçüncü ölkələrin üzərinə qoymaq cəhdlərini Ermənistanın vicdanına buraxırıq”, – o, Ermənistanın baş naziri Nikol Paşinyanın Rusiyanın Qarabağın təhlükəsizliyinin qarantı olması ilə bağlı bəyanatını şərh edərkən deyib.
Zaxarova vurğulayıb ki, Rusiyanın əsas məqsədi sülhə, sabitliyə və fikir ayrılıqlarının aradan qaldırılmasına nail olmaqdır, lakin bu, yalnız öz məsuliyyəti çərçivəsində edilə bilər.
“Ölkəmizin bütün öhdəlikləri açıq şəkildə yazılıb. Bunlar Azərbaycan, Ermənistan və Rusiya liderlərinin 9 noyabr 2020-ci il tarixli üçtərəfli bəyanatında yazılıb. Sadəcə olaraq, bu sənədi açıb görmək lazımdır ki, ölkəmizin hansı öhdəlikləri var? Hər şey sadələşəcək. Rusiya sülhməramlıları vəziyyətin gərginləşməsinin qarşısını almaq və yerdə vəziyyətin sabitləşməsi üçün əllərindən gələni edirlər və onlar da bunu öz məsuliyyət dairələri daxilində edirlər”, – sözçü bildirib.
Qeyd edək ki, Paşinyan cümə axşamı günü Azərbaycanın Laçın yolunu “blokadaya” alması nəticəsində Qarabağda yaranmış humanitar böhranın fəlakətə çevrilməsinin qarşısının alınmasında Rusiya sülhməramlılarının xidmətlərini qeyd edib. O, əlavə edib ki, 2020-ci ildə Rusiya “Qarabağ xalqı”nın təhlükəsizliyinin və mülki infrastrukturunun təminatçısı rolunu öz üzərinə götürüb.
