“Lavrovun səfəri çərçivəsində həll olunmalı vacib məsələ...” - ŞƏRH

“Lavrovun Azərbaycana kifayət qədər zəngin səfər proqramı var. Lakin onun Azərbaycan xeyrinə hansısa ciddi addım atacağı inandırıcı görünmür”.

Bunu Rusiya XİN rəhbəri Sergey Lavrovun Azərbaycana səfərinin yaxın perspektivdə hansı dəyişikliklərə yol açacağından danışan politoloq Samir Hümbətov Busaat.az-a açıqlamasında deyib.

O bildirib ki, Lavrovun Azərbaycana səfəri önəmli bir vaxta təsadüf edir:

“Bu səfərin arxasında duran bir sıra səbəblər var. Həmin səbəblərdən bir neçəsi isə son dövrlər Ermənistan-Rusiya gərginliyinin artması, Ermənistanın Rusiyadan uzaqlaşma cəhdləri, eyni zamanda Ermənistan Qərb yaxınlaşmasının daha da sürətlənməsidir. Rusiya Cənubi Qafqazda təsir gücünü itirmək istəmir. Ona görə də Ermənistanda itirdiyi mövqeləri, Azərbaycanla bərpa etməyə çalışır. Hər halda Lavrovun verəcəyi mesajlar çox önəmlidir. Müzakirə olunacaq məsələlər sırasında önəmli yeri ikili əməkdaşlıq münasibətləri tutur”.

“Lavrovun Azərbaycana kifayət qədər zəngin səfər proqramı var. Lakin onun Azərbaycan xeyrinə hansısa ciddi addım atacağı inandırıcı görünmür. Hər halda səfərin keçirilməsindən sonra regionda baş verəcək proseslər bizə nəyin hansı istiqamətdə cərəyan etdiyini görməyə imkan verəcək. Düşünürəm ki, Ermənistanın Avropaya yaxınlaşması Azərbaycanın xeyrinə müəyyən qədər Rusiyanın yön çevirməsinə gətirib çıxara bilər. Yəqin ki, yaxın vaxtlarda səfərin nəticəsini görəcəyik”.

Ələsgər / Busaat.az