Fransa prezidenti Emmanuel Makron Ukraynanın Avropa İttifaqına (Aİ) üzvlüyünə mane ola bilər.
Busaat.az xəbər verir ki, bu barədə “Politico” nəşri yazıb.
Nəşrin məlumatına görə, Makron Macarıstanın baş naziri Viktor Orbanın da daxil olduğu Ukraynanın üzvlüyünə qarşı çıxanların koalisiyasına qoşula bilər. Məqalədə deyilir:
“Orban qeyri-adi dairələrdən, o cümlədən Makrondan dəstək ala bilər.
Aydın olur ki, Hollandiya, Yunanıstan və Danimarka da Kiyevin Aİ-yə daxil olmasına qarşıdır. Yüksək səviyyəli avropalı diplomatlardan biri qeyd edib ki, yeni üzvlərin qəbulunu sürətləndirmək üçün səsvermə qaydalarına yenidən baxılması prosesin həddindən artıq siyasiləşməsinə səbəb ola bilər”.
Eyni zamanda, avropalı diplomatlar hesab edirlər ki, bu cür təşəbbüslər müxtəlif ölkələrin siyasi manevrləri üçün imkanlar açır. Məsələn, Yunanıstan Türkiyədən üzvlük məsələsində, Bolqarıstan Şimali Makedoniya ilə münasibətlərdə, Xorvatiya isə Serbiyanın üzvlük prosesi ilə bağlı vəziyyətdən istifadə edə bilər.
Bundan əvvəl Macarıstanın baş naziri Viktor Orban bəyan etmişdi ki, ölkə Ukrayna ilə eyni icmanın bir hissəsi olmaq istəmir və bu, Avropa İttifaqına daimi münaqişə təhlükəsi gətirəcək. O qeyd edib ki, Kiyevin Aİ-yə daxil olması ilə bağlı referendumda iştirak edən Macarıstan vətəndaşlarının 95%-i bunun əleyhinə səs verib. Macarıstanın baş naziri qeyd edib ki, yalnız 5% Ukraynanın üzvlüyünü dəstəkləyib.
Yeganə
