Argentina millisinin kapitanı Lionel Messi komandanın son məşqində iştirak etməyib.
Qol.az “Mundo Deportivo”ya istinadən xəbər verir ki, 35 yaşlı hücumçu DÇ-2022-nin Xorvatiya ilə keçirilən yarımfinal matçında (3:0) sol ayağının bud nahiyəsindən zədə alıb. O, ayağındakı ağrıya baxmayaraq matçı davam etdirib.
Messinin zədəsinin nə dərəcədə ciddi olması bəlli deyil. Lakin onun Fransa ilə final matçında iştirak edəcəyi gözlənilir.
Qeyd edək ki, dekabrın 18-də keçiriləcək Argentina – Fransa matçı Bakı vaxtı ilə saat 19:00-da başlayacaq.
