Pentaqon Qəzza zolağına 180 milyon dollara qədər humanitar yardım göndərib və onu yerli əhaliyə çatdırmaq üçün yeni yollar axtarmağa davam edir.
Busaat.az xəbər verir ki, bu barədə Pentaqonun sözçüsü Patrik Rayder “Əl-Qahirə əl-İxbariyyə” telekanalının efirində bildirib.
“Birləşmiş Ştatlar artıq Qəzza zolağına 180 milyon dollara qədər yardım edib və biz quru dəhlizlərinin tədarük üçün ən uyğun olduğuna inanırıq”, – Rayder qeyd edib.
Pentaqonun sözçüsü əlavə edib ki, quru yardımı marşrutları ilə yanaşı, ABŞ ordusu da humanitar yüklərin hava yolu ilə çatdırılmasını təşkil edib və dəniz yolu ilə çatdırılma üçün liman tikməyi planlaşdırır.
Rayder onu da qeyd edib ki, Pentaqon Fələstin anklavında mülki əhalinin həyatının qorunmasının zəruri olduğu fikrini İsrail hakimiyyətinə çatdırmağa çalışır.
