“İranın Azərbaycanla münasibətlərinin gərginləşməsində rolu olsa da ABŞ və İsrailin Azərbaycanı İranla münaqişəyə sürükləmək istəyi anlaşılandır”.
Bunu Ermənistan-Azərbaycan liderlərinin Vaşinqtonda planlanan görüşü barədə fikirlərini söyləyən politoloq Elşən Manafov Busaat.az-a açıqlamasında deyib.
O bildirib ki, hazırda Azərbaycan ətrafında mürəkkəb geosiyasi halqanın mövcudluğunu müşahidə edirik:
“Ermənistanla mövcud münaqişənin nəticələri aradan qaldırılmadan ABŞ və onun bölgədəki təmsilçisi İsrailin Azərbaycanı ciddi cəhdlə İrana qarşı münaqişəyə sürüklədiyini hesab edirəm. İranın Azərbaycanla münasibətlərinin gərginləşməsində rolu olsa da ABŞ və İsrailin Azərbaycanı İranla münaqişəyə sürükləmək istəyi anlaşılandır”.
“ABŞ Azərbaycan-Ermənistan liderlərini Vaşinqtonda görüşdürərək Cənubi Qafqaz regionunda İran və Rusiyanın təsir imkanlarını azaltmağa çalışır. Əlavə olaraq Türkiyənin də regionda mövqeyinin Qərbi məmnun etmədiyini qeyd etmək lazımdır. Nə qədər ki, Rusiyanın Cənubi Qafqazda hərbi ehtiyatları var, ABŞ-nin bu regionda söz sahibi olmaq istəyi üçün atdığı addımların boşa olacağını hesab edirəm. Azərbaycan da proseslərin hansı səviyyədə inkişaf edəcəyini yaxşı başa düşür. Bu səbəbdən Vaşinqtonda görüş keçirilsə də Azərbaycan Rusiya ilə münasibətlərimizə zərər verə biləcək amillərdən kənarda qalacaq”, – politoloq əlavə edib.
Ələsgər / Busaat.az
