Keniya, Somali və Efiopiyada humanitar vəziyyətin sürətlə pisləşdiyi, Somalidə 2011-ci ildəki aclıqdan sonra ən şiddətli quraqlığın yaşandığı qeyd edilib.
Busaat.az xəbər verir ki, bu barədə məlumat Böyük Britaniyanın beynəlxalq humanitar təşkilatı Oxfam-dan verilən yazılı açıqlamada yer alıb.
Açıqlamada Şərqi Afrikada son 4 yağış mövsümünün hamısında kifayət qədər yağıntı qeydə alınmadığı və qarşıdakı 3 ay ərzində quraqlığın davam edəcəyi gözlənildiyi ifadə edilərək, iqlim dəyişikliyinin məhsulun böyük bir hissəsini məhv etdiyi vurğulanıb. Eyni zamanda, quraqlıq səbəbiylə mal-qara sahibləri ənənəvi həyat tərzlərindən əl çəkməyə məcbur olub.
3 milyard daha lazımdır
Açıqlamada may ayından etibarən Somali, Keniya və Efiopiyada aclıqdan ölüm hallarının artdığı və bu müddət ərzində hər 48 saniyədə bir nəfərin öldüyü bildirilib.
Rusiya-Ukrayna müharibəsindən sonra ərzaq qiymətlərindəki artıma diqqət çəkən açıqlamada, mövcud vəziyyətin davam edəcəyi təqdirdə ilin sonuna qədər bölgədə hər 36 saniyədə bir adamın aclıqdan ölməsi ehtimalının yüksək olduğu qeyd edilib.
Oxfam həmçinin Cənubi Sudan, Somali, Keniya və Efiopiyada ehtiyacı olanlara adekvat yardım çatdırmaq üçün əlavə 3 milyard dollara ehtiyac olduğunu açıqlayıb.
