Rusiyadakı sanksiyaların Azərbaycana təsiri: "Müəyyən problemlər yaşana bilər"

“Hansısa məhsulun ixracı məsələsində Azərbaycanla Rusiya arasında rəqabət varsa, həmin məhsulun ixracatı ölkəmiz üçün faydalı olacaq”.

Bunu Rusiyaya tətbiq olunan sanksiyaların Azərbaycan iqtisadiyyatına təsirlərini təhlil edən iqtisadçı Eldəniz Əmirov Busaat.az-a açıqlamasında deyib.

Onun sözlərinə görə, Rusiyaya tətbiq olunan sanksiyalar iqtisadi əməkdaşlıq çərçivəsində müəyyən istiqamətlər üzrə Azərbaycana mənfi və müsbət təsirlərə malik olacaq:

“Müsbət amil odur ki, rublun ucuzlaşması fonunda Rusiyada istehsal olunan məhsulların maya dəyəri aşağı düşə bilər. Eyni zamanda sanskiyalar Rusiyanın digər ölkələrə ixrac imkanlarını azaldacaq və nəticədə məhsul bolluğu yaranacaq. Bu isə Azərbaycan üçün əlavə fürsətlər yarada bilər. Həmçinin hansısa məhsulun ixracı məsələsində Azərbaycanla Rusiya arasında rəqabət varsa, həmin məhsulun ixracatı ölkəmiz üçün faydalı olacaq.

Mənfi təsirlər Azərbaycanın Rusiyadan idxal asılılığı ilə bağlı məsələdə olacaq. Belə ki, Rusiyada istehsalın zəifləməsi nəticəsində Azərbaycanda müəyyən zəruri məhsulların idxalı zamanı problemlər yaşana bilər. Bununla yanaşı, Rusiyada yaşayan azərbaycanlılar ayda və ya rübdə bir dəfə Azərbaycana gəlirlər. Onların hesabından ölkəmizə pul vəsaiti daxil olur və həmin adamların Azərbaycanda yaşayan ailələri bu vəsait hesabına yaşayırlar. Sanskiyalar həmin ailələrə mənfi təsir edəcək”.

Busaat.az