“Şirkətin əldə etdiyi gəlir cərimə ödəmələri ilə birlikdə Azərbaycan dövlətinə verilməlidir”.
Bunu Xocalının Seyidbəyli kəndində qanunsuz fəaliyyət göstərən “Vallex” şirkəti haqqında fikirlərini bildirən iqtisadçı Xalid Kərimli Busaat.az-a açıqlamasında deyib.
O bildirib ki, məsələ beynəlxalq hüquq çərçivəsində həll olunmalıdır: “Ölkə qanunvericiliyinə gəldikdə Xocalının Seyidbəyli kəndində fəaliyyət göstərən “Vallex” şirkəti yerləşdiyi ərazi Azərbaycan dövlətinə məxsusdur. Hətta bir misal çəkim. Yeni bir torpaq sahəsi aldığımızı fərz edək. Həmin sahədən hansısa faydalı qazıntı – neft, qızıl çıxacaqsa mülkiyyətiniz olsa belə ərazi dövlət mülkiyyəti sayılır. Dövlət sözügedən ərazini bazar qiymətinə sizdən alaraq faydalı qazıntıların çıxarılması fəaliyyətinə başlayacaq.
Müəyyən müddət və şərt qarşılığında dövlətə rüsum ödəməklə hansısa şirkətə faydalı qazıntı olan ərazidə istismar hüququ verilə bilər. Qanunsuz fəaliyyət göstərən “Vallex” şirkəti isə, Azərbaycan dövlətinin əmlakını talayır”.
İqtisadçı qanunsuz əməllərə qarşı atılması labüd addımlara toxunub: “Həmin şirkət haqda Azərbaycan Respublikası beynəlxalq məhkəməyə müraciət etməlidir. Xocalı rayonu Azərbaycan Respublikası yurisdiksiyasında olduğuna görə yerli məhkəmədə də məsələ qaldırıla bilər. Şirkətin əldə etdiyi gəlir cərimə ödəmələri ilə birlikdə Azərbaycan dövlətinə verilməlidir. Ekologiyaya dəyən ziyan da hesablandıqdan sonra konpensasiya alınmalıdır”.
Busaat.az/Ələsgər
