"Vaşinqtonla heç bir danışıqlar olmayacaq" - Əraqçi

İranın xarici işlər naziri Abbas Əraqçi Tehranın nüvə məsələsi istisna olmaqla, Vaşinqtonla heç bir danışıqlar aparmayacağını bildirib və İranın raket və regional məsələlərdə dəqiq mövqeyini təkrarlayıb.

Busaat.az xəbər verir ki, bu barədə İranın “Mehr” agentliyi məlumat yayıb.

Nazirlər Kabinetinin bugünkü iclası çərçivəsində çıxış edən xarici işlər naziri Abbas Əraqçi deyib ki, Birləşmiş Ştatlar keçmiş müzakirələrdə dəfələrlə raket və regional problemləri qaldırmağa cəhd etsə də, İranın bu mövzulardakı mövqeyi həmişə aydın olub.

O, vurğulayıb ki, ABŞ-la hər hansı danışıqlar aparılarsa, onlar yalnız nüvə məsələsi ilə bağlı olacaqlar.

Əraqçi həmçinin İran və Oman arasında davam edən strukturlaşdırılmış dialoqa toxunaraq, ikitərəfli məsləhətləşmələrin mütəmadi olaraq hər altı aydan bir Tehran və Maskatda keçirildiyini qeyd edib.

İran Xarici İşlər Nazirliyinin sözçüsü İsmail Bəqayi bazar ertəsi keçirdiyi mətbuat brifinqi zamanı Omanın ABŞ-dan İrana rəsmi mesaj çatdırması ilə bağlı xəbərləri təkzib edib.

Onun sözlərinə görə, vasitəçilər mesajlar və ya əlavə notlar mübadiləsi edə bilsələr də, bu cür mübadilələr İran və ABŞ arasında hər hansı danışıqlar prosesi təşkil etmir və ya ona gətirib çıxarmır.

Yeganə