“Yaxşı olar ki, Fransa öz daxili problemləri ilə məşğul olsun” - ŞƏRH

Fransadakı son qarşıdurmalar necə şərh etmək olar? Fransada bu cür qeyri – insani davranışların sərgiləndiyi halda Fransa dövlətinin demokratiya və insan haqlarından danışması nə dərəcədə doğrudur? Sülh danışıqlarına Fransa hadisələrin təsiri nə ola bilər?

Bu suallarla bağlı politoloq Gülsel Səfərova Busaat.az-a açıqlama verib:

“Fransadakı qəzəb bugünkü günün qəzəbi deyil. Avropaya mütəmadi səyahət edən, ölkəmizi təmsil edən şəxs kimi deyə bilərəm ki, bütün Avropa ölkələri içində vətəndaşlarına ən qəddar davranan Fransa dövləti və Fransa polisidir. Bunu şəxsən müşahidə etmişəm. Müxtəlif mitinqlərdə vətəndaşlara Fransa polisinin amansız davranışlarına şahid olmuşam. Məcazi mənada desək, bu kasa bir gün daşmalı idi və daşdı da. Öldürülən gənc Əlcəzair kökənli idi. Bəlkə də bu şəxs fransız vətəndaşı olsaydı bu qədər skandal olmazdı. Amma nəticədə Əlcəzairin Fransadakı icmalarının ciddi narazılığına səbəb oldu.

Sülh danışıqlarına hər hansısa bir təsirindən söhbət gedə bilməz. 44 günlük müharibədə də Fransa bizə qarşı bizə ədalətsiz mövqeyi ilə yadda qaldı. ATƏT – in Minsk qrupu da artıq yoxdur. Sülh müqaviləsinin reallaşması yalnız Azərbaycan və Ermənistan liderlərinin iradəsi ilə olacaq. Hansısa bir ölkənin sülhə töhfə verməsi isə alqışlanacaqdır. Biz hazırda Rusiya, Avropa və ABŞ -ın sülhlə bağlı vasitəçiliyini görürük. Fransa isə bu vasitəçilikdən kənardı. Yaxşı olar ki, Fransa öz daxili problemləri ilə məşğul olsun. Azərbaycan dövləti də heç bir ölkənin daxili işinə qarışmır.”

Bünyamin Bünyadzadə
Busaat.az