Son bir ildə Qarabağda vəziyyət kökündən dəyişib və Rusiya sülhməramlılarının regiondakı fəaliyyəti yeni şərtlərə uyğunlaşdırılacaq.
Busaat.az xəbər verir ki, bu barədə Rusiya Xarici İşlər Nazirliyinin sözçüsü Mariya Zaxarova bildirib.
“Son bir ildə Qarabağda vəziyyət kökündən dəyişib və Ermənistanın baş naziri Nikol Paşinyan 2022-ci ilin oktyabrında Praqada Avropa İttifaqının himayəsi altında keçirilən sammitdə Qarabağ bölgəsini Azərbaycan ərazisi kimi tanıyıb. Eyni zamanda, Brüsseldə keçirilən sammitlərdə öz mövqeyini bir daha təsdiqləyib. Buna görə də Rusiya sülhməramlı kontingentinin bölgəyə yeridilməsi şərtləri əsaslı şəkildə tənzimləndi və bu il 19-20 sentyabr hərbi əməliyyatlarından sonra əhalinin kütləvi köçü fonunda sülhməramlılarımızın fəaliyyəti uyğunlaşdırılacaq”, – rusiyalı diplomat söyləyib.
O bildirib ki, Rusiya sülhməramlı kontingentinin bəzi stasionar və müvəqqəti müşahidə məntəqələri artıq sökülüb.
“Sülhməramlılarla bağlı prinsipial məsələlər, artıq dediyimiz kimi, Bakı ilə müzakirə olunur”, – deyə Zaxaraova bildirib.
