ABŞ prezidenti Donald Tramp administrasiyası Fələstin pasportu sahibləri üçün qeyri-immiqrasiya vizalarının təsdiqini dayandırıb. “The New York Times” qəzetinin məsələ ilə tanış olan 4 ABŞ rəsmisinə istinadən verdiyi məlumata görə, ABŞ administrasiyası Qəzzalılar üçün bütün ziyarət vizalarının dayandırıldığını elan edərək, bununla bağlı daha bir addım atıb.
Busaat.az xəbər verir ki, avqustun 18-də ABŞ Dövlət Departamenti bütün ABŞ səfirliklərinə göndərilən memorandumda İordan çayının qərb sahilindən və Fələstin diasporundan olan şəxslər üçün qeyri-immiqrasiya vizasının rəsmiləşdirilməsinin dayandırılmasını əmr edib.
ABŞ vizasının ləğvi
ABŞ Dövlət Departamenti avqustun 29-da sentyabrda Nyu-Yorkda keçiriləcək Birləşmiş Millətlər Təşkilatının (BMT) 80-ci Baş Assambleyasında iştirak etmək üçün ABŞ-a səfər edən Fələstin rəsmilərinin vizalarının ləğv edildiyini açıqlayıb.
Bəyanatda deyilir: “ABŞ qanunlarına uyğun olaraq, dövlət katibi Marko Rubio qarşıdan gələn BMT Baş Assambleyası ərəfəsində Fələstin Azadlıq Təşkilatı və Fələstin Muxtariyyəti üzvlərinin vizalarını rədd edib”.
ABŞ-ın bu qərarı fələstinlilərin tənqidinə səbəb olub.
Bu arada ABŞ Dövlət Departamenti avqustun 16-da Qəzza əhalisinə hər cür ziyarət vizalarının verilməsini dayandırdığını elan etmişdi.
Yeganə
