Hindistanda keçirilən G20 xarici işlər nazirlərinin görüşü Ukraynadakı müharibə ilə bağlı ABŞ və Rusiya nümayəndələri arasında mübahisələrlə yadda qalıb.
Busaat.az xarici mediaya istinadən xəbər verir ki, ABŞ dövlət katibi Antoni Blinken rusiyalı həmkarı Sergey Lavrovla bir il əvvəl müharibə başlayandan sonra qısa da olsa ilk dəfə görüşüb.
Məlumata görə Blinkenin Lavrova deyib: “ABŞ nə qədər vaxt aparsa da, Ukraynanı dəstəkləyəcək”.
ABŞ Dövlət Departamentinin yüksək rütbəli rəsmisi görüşün 10 dəqiqə davam etdiyini bildirib.
Blinkenin Rusiyada həbsdə olan ABŞ vətəndaşı Paul Whelan-ın azadlığa buraxılmalı və Rusiyanın geri çəkildiyi nüvə silahlarına nəzarət müqaviləsinə qayıtmalı olduğunu dediyi bildirilib.
Lavrovun cavabının nə olduğu bildirilməyib. Eyni rəsmi əlavə edib ki, Rusiyanın yaxın zamanlarda mövqeyini dəyişəcəyinə dair heç bir əlamət yoxdur.
İkili sonuncu dəfə ötən ilin yanvarında Cenevrədə görüşüb.
Avropa İttifaqı ilə yanaşı dünyanın ən zəngin 19 ölkəsindən ibarət olan G20 qlobal iqtisadiyyatın 85 faizini və dünya əhalisinin üçdə ikisini təmsil edir.
Görüşlər zamanı ABŞ və Rusiyanın xarici işlər nazirləri qarşılıqlı olaraq bir-birini ittiham ediblər.
Lavrov Qərb ölkələrinin diplomatiya əvəzinə təhdid və şantajdan istifadə etdiyini, Blinken isə Rusiyanı “ədalətsiz və qeyri-qanuni” müharibəyə başlamaqda ittiham edib.
