Texnologiyanın sürətlə inkişaf etdiyi dövrdə internet artıq lüks deyil, zərurətə çevrilib. Lakin ölkəmizdə bu zərurətin qiyməti bir çoxlarını narazı salır. Günümüzdə təkcə sadə vətəndaşlar deyil, hətta məşhurlar da internet tariflərinin baha olmasından şikayətlənir, xaricdə daha əlverişli şərtlərin mövcud olduğunu vurğulayırlar.
Bəs internet qiymətlərinin yüksək olması nə ilə əlaqədardır? Bu mövzuda mütəxəssislər nə deyir?
Busaat.az xəbər verir ki, Yenisabah.az məsələni informasiya texnologiyaları üzrə ekspert Elvin Abbasovla müzakirə edib. İT mütəxəssisi iddialara belə aydınlıq gətirib:
“2024-cü ilin sonunda Azərbaycanda ölkə üzrə internet infrastrukturu tam təkmilləşdirilmiş və yüksək sürətli internet istifadəyə verilmişdir. Bu layihə beynəlxalq təşkilatlar və Dünya Bankının maliyyə dəstəyi olmadan, yerli dövlət və özəl provayderlərin hesabına həyata keçirilmişdir.
İnternet tariflərinə gəldikdə, alt limit paketlər yenidən tərtib olunmuş və daha optimal şərtlərlə təqdim edilmişdir. Sürətli internet anlayışı 25 meqabitdən yüksək sürətlər üçün keçərlidir, çünki müasir texnologiyalar və rəqəmsal xidmətlər bu sürətləri tələb edir. 25 meqabitdən aşağı internet bağlantısı zamanı resursların açılmasında ləngimələr baş verir. Məsələn, “YouTube” platformasına daxil olmaq üçün minimum 1 meqabit sürət tələb olunur və eyni anda bir neçə istifadəçi bu platformadan istifadə etdikdə internetin keyfiyyətində azalmalar müşahidə edilirdi. İnfrastrukturun yenilənməsi nəticəsində isə bu cür problemlər əhəmiyyətli dərəcədə azalmışdır. Həmçinin, beynəlxalq statistikada Azərbaycanın internet keyfiyyətinə görə daha yüksək pillələrə qalxması üçün mühüm addımlar atılmışdır”.
Ekspert onu da vurğulayıb ki, qonşu ölkələrlə müqayisədə internet qiymətlərində çox cüzi fərq mövcuddur:
“Xarici ölkələrlə müqayisə apardıqda görürük ki, bir çox ölkədə 100 meqabit və daha yüksək internet xidmətləri standart hal almışdır. 25 meqabit sürəti artıq sürətli internet hesab edilmir. Bəzi ölkələrdə isə alt limit tarifləri 50 meqabitdən başlayır. Qonşu ölkələrlə müqayisədə Azərbaycanın internet tarifləri 1-2 manat fərqlə demək olar ki, eyni səviyyədədir.
Bundan əlavə, ölkənin bütün ucqar rayonlarında sürətli internet infrastrukturu bərpa olunmuşdur. Bu bölgələrdə də yüksək sürətli internetin əlçatan olması üçün daha sərfəli tariflər tətbiq edilmişdir. Bu addımlar həm vətəndaşların internetdən istifadəsini asanlaşdırmış, həm də ölkənin rəqəmsal inkişafına töhfə vermişdir”.
