Honq-Konqdan Dehliyə uçan “Air India” aviaşirkətinə məxsus sərnişin təyyarəsi eniş etdikdən sonra yanıb.
Busaat.az bildirir ki, bu barədə aviaşirkətin mətbuat xidməti məlumat yayıb.
Şirkətdən verilən məlumata görə, yanğın köməkçi enerji blokunda sərnişinlərin enişi zamanı baş verib. Təhlükəsizlik protokollarında nəzərdə tutulduğu kimi sistem avtomatik olaraq cihazı söndürüb. Yanğının tez bir zamanda qarşısı alınıb, itki yoxdur.
Bütün sərnişinlər və ekipaj üzvləri təhlükəsiz şəkildə təxliyə edilib. Təyyarəyə cüzi ziyan dəyib və hadisənin səbəbləri araşdırılana qədər müvəqqəti istismardan çıxarılıb.
Qeyd edək ki, bu, son aylarda “Air India” aviaşirkəti ilə bağlı baş verən ikinci insidentdir. İyunun 12-də Londona uçan “Boeing 787-8” təyyarəsi havaya qalxdıqdan qısa müddət sonra qəzaya uğrayıb və 241 nəfərin həyatına son qoyub./Globalinfo.az
