Türkiyə və Qətərin iştirakı ilə Rusiyanın Afrikaya taxıl ixracı ilə bağlı müzakirələr davam edir.
Busaat.az xəbər verir ki, bu barədə Ankaradakı diplomat TASS-a bildirib.
“Bu müzakirələr davam edir. Xarici işlər nazirlikləri arasında danışıqlar aparılır. Təchizatların işə salınması üçün inzibati maneələr aradan qaldırılmalıdır”, – diplomat deyib.
Onun sözlərinə görə, Türkiyə bu tədarüklərin həyata keçirilməsinə tam sadiqdir.
Avqustun 31-də Moskvada Rusiyanın xarici işlər naziri Sergey Lavrov və türkiyəli həmkarı Hakan Fidan arasında danışıqlar aparılıb. Onlar Qara dəniz taxıl sazişini və Qətərin maliyyə dəstəyi ilə Türkiyəyə güzəştli qiymətlə bir milyon ton Rusiya taxılının tədarükü təşəbbüsünün necə həyata keçirilməsini müzakirə ediblər. Sentyabrın 4-də Rusiya prezidenti Vladimir Putin və Türkiyə lideri Rəcəb Tayyib Ərdoğan Soçidə ikitərəfli görüşdə bu məsələ barədə danışıqlar aparıblar.
Tərəflər qeyd ediblər ki, bu təklif iyulun 17-də dayandırılmış, hazırda fəaliyyətini dayandırmış Qara Dəniz Taxıl Təşəbbüsünü əvəz etmək üçün nəzərdə tutulmayıb. Əksinə, onun məqsədi ehtiyacı olan ölkələrə təsir edən kritik qida təhlükəsizliyi məsələlərini yaxşılaşdırmaqdır. Türkiyə təklif olunan təşəbbüsü dəstəklədiyini bildirib və onu həyata keçirməyə hazır olduğunu bəyan edib.
