Ərdoğan Putinlə Ukraynadakı hərbi əməliyyatları müzakirə etməyi planlaşdırır

Türkiyə prezidenti Ukraynada nüvə silahından istifadənin mümkünlüyünü fəlakət adlandırıb.

Busaat.az xəbər verir ki, Türkiyə prezidenti Rəcəb Tayyib Ərdoğan rusiyalı həmkarı Vladimir Putin ilə Ukrayna böhranının həlli ilə bağlı perspektivləri müzakirə etməyi planlaşdırdığını bildirib.

“Ümid edirəm ki, cənab Putinlə Ukrayna böhranının həlli ilə bağlı müzakirə aparacağıq. Mən pessimist deyiləm. Dərhal müsbət nəticələrin qəbul edilməsi sadəlövhlük olar. Ukraynanın dörd regionunda keçirilmiş referendumlar problemlər yaradır, lakin hər şey diplomatik yollarla həll oluna bilər. Eyni hal 2014-cü ildə Krımın timsalında baş vermişdi. Lakin o vaxtlar nəticə verməmişdi” –deyə Ərdoğan qeyd edib.

Ukraynada nüvə silahından istifadənin mümkünlüyünü fəlakət adlandıran Türkiyə prezidenti, “Müharibədə Ukraynaya qarşı nüvə silahının istifadə edilməsi fəlakətdir. Biz bu barədə danışmamalıyıq, hətta bu barədə düşünməməliyik. Münaqişənin qarşısını almaq üçün diplomatik vasitələrdən istifadə etmək vacibdir” – deyə, Türkiyə lideri əlavə edib.