“Ermənistan tez tələsik Avropa İttifaqının nümayəndələrini regiona gətirmək və İranı bu münaqişəyə cəlb etməklə onlardan qalxan kimi istifadə etmək istəyir”.
Bunu “Bütün problemləri həll etməyin bir yolu var – dinc danışıqlar” deyən Ararat Mirzoyanın açıqlamasını şərh edən politoloq Vüqar Əhmədov Busaat.az-a danışarkən deyib.
O bildirib ki, Ararat Mirzoyanın problemi dinc yolla həll etmək təklifinin formulunu Azərbaycan artıq iki ildir təklif edir:
“Problem ondadır ki, Ermənistan rəsmilərinin açıqlamaları ilə əməlləri bir-birinə uyğun gəlmir. Azərbaycan dəfələrlə xəbərdarlıq etdi ki, əgər Ermənistan üzərinə götürdüyü öhdəlikləri, yəni Naxçıvana Zəngəzur dəhlizinin təmin olunması, sərhədlərin delimitasiyası, sülh müqaviləsi və regional əməkdaşlıqla bağlı real addımlar atmasa məsələ yenidən güc müstəvisinə keçəcək. Bundan artıq necə problemi həll etmək olar axı, Azərbaycan bunun formulunu və yolunu göstərib, məsələ burasındadır ki, Ermənistan bunların heç biri ilə bağlı belə real addım atmayıb, Azərbaycanın verdiyi şansların heç birini dəyərləndirməyərək prosesi uzatmağa çalışır. Azərbaycan tərəfi dəfələrlə xəbərdarlıq etdi və yanvarın sonuna qədər razılaşmalarla bağlı vaxt qoydu. İndi görsənir ki, Ermənistan yenə də vaxtı uzadır, nələrəsə ümidi var və gözləyir. Lakin anlayır ki, Azərbaycanın artıq səbri tükənir və problemin həllində alternativ yollara əl atmaq məcburiyyətində qala bilər. Ona görə tez tələsik Avropa İttifaqının nümayəndələrini regiona gətirmək və İranı bu münaqişəyə cəlb etməklə onlardan qalxan kimi istifadə etmək istəyir. Lakin bu əksinə olaraq Ermənistanın əleyhinə işləyəcək. Ermənistan rəsmilərinin bu açıqlamalarından və mövqeyindən anlaşılır ki, onlar öhdəlikləri dinc yolla yerinə yetirmək istəmirlər”.
Ələsgər / Busaat.az
