“Paşinyan müxalifətdə olarkən Ermənistanın KTMT, habelə AİB-dən çıxmasının zəruriliyi ilə bağlı bəyanatlar verib”.
Bunu Ermənistan Baş naziri Nikol Paşinyanın mətbuat konfransında KTMT-nin Ermənistandakı təlimindən imtina etməsi qərarına münasibət bildirən politoloq Elşən Manafov Busaat.az-a açıqlamasında deyib.
O bildirib ki, Paşinyanin mövqeyi Rusiya və KTMT-ni təxribata sürükləmək, Azərbaycanla ehtimal olunan perspektiv hərbi qarşıdurmaya cəlb etməyə hesablanıb: “Ermənistan artıq iki ilə yaxındır ki, üçtərəfli bəyənatın şərtlərindən irəli gələn öhdəliklərə əməl etmir. Bu isə rəsmi Bakının açıqlamalarında müharibə ritorikasinin artmasına səbəb olub. Paşinyan başa düşür ki, onun ikili mövqeyi əvvəl-axır yenidən tərəflər arasında hərbi qarşıdurmanı qaçınılmaz edəcək. Ona görə özünü sığortalamaq, KTMT-dən hərbi əməliyyatların başlanacağı təqdirdə təminat almaq istəyir”.
Paşinyanın anti-Moskva niyyətlərinə toxunan politoloq qeyd edib: “Rusiyanın Ukraynada faktiki olaraq NATO ilə apardığı müharibə onun Cəbubi Qafqaz maraqlarına uyğun siyasət sərgiləməyən Ermənistana qarşı ciddi tədbir görmək imkanını məhdudlaşdırıb. Paşinyan müxalifətdə olarkən Ermənistanın KTMT, habelə AİB-dən çıxmasının zəruriliyi ilə bağlı bəyanatlar verib. Əslində ona hakimiyyətə gəlməyə məhz həmin layihəni gerçəkləşdirmək üçün Qərbdəki havadarları dəstək olub”.
Ələsgər / Busaat.az
