Evlənmək istəyənlərə ŞAD XƏBƏR: Birdəfəlik maddi yardım göstərilə bilər

Türkiyədə yeni evlənən gənclər üçün maddi dəstək mexanizmi tətbiq olunacağı açıqlanıb. Belə ki, 18–35 yaş aralığında olan, gəliri minimum əməkhaqqından artıq olmayan gənclərə evlilik məqsədilə 500 min lirə (təxminən 19 min AZN) məbləğində maliyyə yardımı göstəriləcək. Bu yardımın birdəfəlik və ya güzəştli şərtlərlə verilməsi nəzərdə tutulur. Bəs oxşar sosial dəstək mexanizmi Azərbaycanda da tətbiq oluna bilərmi?

Mövzu ilə bağlı KONKRET.az-a açıqlama verən iqtisadçı Natiq Cəfərli bildirib ki, bir çox ölkələrdə gənc ailələrin dəstəklənməsi məqsədilə bu tip praktikalar mövcuddur.

“Hazırda Azərbaycanda yeni evlənən gənclərə birdəfəlik yardım və ya faizsiz kredit verilməsi ilə bağlı konkret qanun layihəsi, rəsmi təklif və ya geniş ictimai müzakirə yoxdur”.

İqtisadçı qeyd edib ki, Milli Məclisin bu ilin ilk yarımiliyi üçün qanunvericilik planında müxtəlif layihələr yer alsa da, gənc ailələrin birbaşa maliyyə dəstəyi ilə bağlı ayrıca qanun təşəbbüsü nəzərdə tutulmayıb.

“Bununla belə, bu məsələ ətrafında müzakirələrin aparılmasına ehtiyac var. Sosial-iqtisadi vəziyyət, gənclərin maddi çətinlikləri nəzərə alınarsa, gələcəkdə Azərbaycanda da oxşar addımların atılması zəruri ola bilər”, – deyə Natiq Cəfərli vurğulayıb.

Qeyd edək ki, ekspertlər gənc ailələrə göstərilən maliyyə dəstəyinin demoqrafik vəziyyətə, sosial rifaha və ailə institutunun möhkəmlənməsinə müsbət təsir göstərə biləcəyini bildirirlər.