İran Azərbaycanı zəlzələ ilə qorxudur: “Qonşular ilə münasibəti yaxşılaşdırmaqdansa...”

“Bu kimi münasibətlər İrana ancaq aqressivlik və neqativ tendensiya bəxş edir”.

Bunu İranın Azərbaycana qarşı növbəti təxribatı sayılan “Bakıda zəlzələ olacaq” xəbərinə münasibət bildirən politoloq Tural İsmayılov Busaat.az-a açıqlamasında deyib.

O bildirib ki, İranın Azərbaycana qarşı təxribatlarının hazırki rejim hakimiyyətdə olduğu dövrdə düzələcəyini düşünmür:

“İrandakı dövlət idarəetmə sistemi elə qurulub ki, normal islahatlar həyata keçirib qonşuları ilə münasibətləri yaxşılaşdırmaq əvəzinə dünyadakı təxribatçılığı qızışdırır. Bu kimi münasibətlər İrana ancaq aqressivlik və neqativ tendensiya bəxş edir. Bu baxımdan İranın qonşu ölkələrlə münasibətlərini normallaşdırmaq yerinə daha da gərginləşdirməsi onun ənənəvi siyasət ritorikasının davamı kimi xarakterizə edilməlidir. Bütövlükdə mollakratiyanın zehniyyətində hansısa inqilabi dəyişikliklər olmayacağı təqdirdə Azərbaycan və Türkiyəyə qarşı kini, düşmənçiliyi zəifləməyəcək”.

İranın münasibətləri gərginləşdirməkdəki məqsədini politoloq belə izah edib: “İranın münasibətləri daha da gərginləşdirməkdə məqsədi ölkə daxilindəki böyük narazılıqlar kollapsından diqqəti yayındırmağa xidmət edir. Hesab edirəm ki, İran cəmiyyəti bu təhlükəli tendensiyanın fərqindədir”.

Ələsgər / Busaat.az