İranda vurulacaq hədəflər müəyyən edildi

“Nüvə Silahına qarşı İran Birliyi” Təşkilatı (United Against Nuclear Iran – UANI) İranla bağlı 50 strateji hədəfi əhatə edən məxfi dosye hazırlayaraq yanvarın 13-də keçirilən təhlükəsizlik iclasından öncə Ağ Evə təqdim edib.

Busaat.az xəbər verir ki, bu barədə Britaniyanın “Daily Mail” nəşri məlumat yayıb.

Məlumata görə, sənəddə İranda etirazların zorakı şəkildə yatırılmasında əsas rol oynayan İran İslam İnqilabı Keşikçiləri Korpusunun (SEPAH) ən mühüm strukturlarından biri – “Sərallah” Qərargahının dəqiq koordinatları da yer alıb.

Qeyd olunur ki, “Sərallah” Qərargahı faktiki olaraq rejimin hərbi komandanlıq mərkəzi funksiyasını yerinə yetirir. Bu struktur təkcə SEPAH-ın deyil, eyni zamanda polis qüvvələrinin əməliyyat nəzarətini də öz əlində cəmləşdirərək, ölkədaxili etirazların yatırılmasında əsas qərarverici rol oynayır.

Mənbə bildirir ki, dosyenin Ağ Evə təqdim olunması Vaşinqtonun İranla bağlı təzyiq və mümkün sərt ssenariləri nəzərdən keçirdiyi bir vaxta təsadüf edir. Bu addım bölgədə gərginliyin daha da artacağına dair ehtimalları gücləndirib.