Joze Mourinyo yeni iş yeri ilə bağlı qərar verdi
“Roma”nın baş məşqçisi Joze Mourinyo “Roma” ilə müqaviləsini yeniləməyi planlaşdırmır.
Busaat.az xəbər verir ki, bu barədə Todofichajes məlumat yayıb.
Mənbənin sözlərinə görə, portuqaliyalı mütəxəssis özünü milli komandada sınamaq istəyir. Mourinyo İtaliya, İngiltərə və ya Braziliyadan gələn təklifləri nəzərdən keçirməyə hazırdır. “Roma”nın çalışdırıcısının ancaq kuboklar qazanmaq məqsədi daşıyan yığma ilə işləməkdə maraqlı olduğu qeyd edilir.
Joze Mourinyo 2021-ci ilin iyulundan “Roma”da çıxış edir. 2021/2022 mövsümündə portuqaliyalı mütəxəssis Roma komandası ilə Konfrans Liqasının qalibi olub. Məşhur məşqçinin İtaliya klubu ilə müqaviləsi 2024-cü ilin iyun ayına qədərdir.
Oktyabrın 5-də “Roma” Avropa Liqasının qrup mərhələsi çərçivəsində “Servette” ilə qarşılaşıb. Joze Mourinyonun yetirmələri rəqibinə 4:0 hesabı ilə qalib gəlib.
